- بنت بتحكي في ذكرى وفاة والدتها أنها فتحت فيس بوك الخاص بوالدتها ف تفاجئت إن في رسايل بتوصل لوالدتها ، فتحت الرسايل لقت والدها بيتكلم. 😢 باعتلها أنُه الحياة صعبة من غيرها وإنُه حتى بعد فوات سنة لسه ريحتها في كل مكان وهو خايف ييجي يوم ريحتها تروح. 💔
ـــــــــ ، ، ــــــــــ
- الفنان حسن كامي مع المذيعة "منى الشاذلي" بعد ما حفيدتُه سربت رسايله لزوجته المتوفية ع فيس بوك طلع قال "لسه عايشة ، والله والله لسه عايشة ، ماتت بالنسبة للناس أما انا ريحتها ف سريري وفي لبسي وفي كل مكان ف البيت اللي عيشنا فيه 40 سنة. ببعتلها رسايل وقولوب ولما بشوف صورة حلوة ببعتهالها وببقى مبسوط اني بشاركها بس برجع ف النهاية افتكر ويصعب عليَّا وأبكي. بس هي عايشة.
ـــــــــ ، ، ــــــــــ
- انا وزوجتي بينا خلافات كتير زي أي أتنين متجوزين ، بس ده ميمنعش أني بحبها حد الأيمان واليقين ، حُب يقترب من العبادة لولا وجود الله ،،، شقتنا فيها 3 غرف نوم "خاصة ، ضيوف ، أطفال" و في الغالب انا بسهر وبنام في غرفة الضيوف وهي زوجتي ف البيت لكن لما بتروح بيت اهلها تقعد شوية عندهم مبنمش غير ف سريرها ، ريحتها بتحسسني بالامان وبتسري جوايا طمئنينة انها موجودة وببقى عندي شغف امتى هترجع.
ـــــــــ ، ، ــــــــــ
- في تتر مُسلسل "آدم و جميلة" الشاعر "عمرو قطامش" قال : "بشوفك معايا ولو مش معايا وادور وادور وعمري يفوت تعبنا ولا مره قلنا كفايه ولا حتى يقدر يفرقنا موت". لخص كتير قوي ف جملتين ، الحب اللي بجد مبينتهيش بالموت ده ممكن يزيد قوي ويكبر قوي. الوفاء والأحسان مبيتنسوش أبدًا.
ـــــــــ ، ، ــــــــــ
الخلاصة المقصود : العشرة حاجة حلوة جدًا لو كنا فيها أوفياء ، لو كنا بنعمل زي ربنا ما قال ،، "أحسان ، معروف ، تصافي وود" وقتها لما طرف بيغيب بالموت او البُعد مبيتنسيش بالعكس ده الحب ليه بيزيد ،،، حبوا الناس اللي معاشرينكم ، عاملوهم زي ما ربنا قال بالود والإحسان ، سيبولهم ذكريات حلوة بحيث لما تمشوا مينسوكمش ويفضلوا يحبوكم حتى ف الغياب.
0 التعليقات :
إرسال تعليق